Մարդկային զարգացման միջազգային կենտրոնը «Սթիթչինգ Սեյվ դը Չիլդրեն Նեդերլանդ» կազմակերպության («Սեյվ դը Չիլդրեն Նիդերլանդներ»), «Արմավիրի զարգացման կենտրոն» ՀԿ-ի (ԱԶԿ), «Մարտունու կանանց համայնքային խորհուրդ» ՀԿ-ի (ՄԿՀԽ) և «Սեյվ դը Չիլդրեն» կազմակերպության (ՍԴՉ) հետ համագործակցությամբ և Եվրոպական հանձնաժողովի ֆինանսական օժանդակությամբ շարունակում է «Պտղի սեռի խտրական ընտրության դեմ պայքար» ծրագրի իրականացումը: Ծրագրի շրջանակներում օգոստոսի  14-ին Գեղարքունիքի  մարզում տեղի ունեցավ «Տեղական մասնակցության և ոչխտրականության» փորձի և գիտելիքի փոխանակման ցանցի՝  Փոխցանցի Գեղարքունիքի մարզային խմբի մեկնարկային հանդիպումը: Հանդիպման ընթացքում  Գեղարքունիքի մարզում գենդերային հարցերով մշտական հանձնաժողովի անդամների, Հայ Առաքելական եկեղեցու, մարզի առողջապահական և կրթական հաստատությունների, հասարակական կազմակերպությունների, բուժաշխատողների և սոցիալական աշխատողների, տեղական ինքնակառավարման մարմինների ներկայացուցիչների մասնակցությամբ քննարկվեց  «Պտղի սեռի խտրական ընտրության դեմ պայքար» ծրագրի գործողություններն ու միջոցառումները, Փոխցանցի գործունեությունը և առաջիկա անելիքները:   Փոխցանցի ձևավորման մեկնարկային հանդիպումներն իրականացվելու են ՀՀ բոլոր մարզերում և Երևանում: