«Երբ առաջին անգամ առնչվեցի հայ-թուրքական հաշտեցման գործընթացին, ականատես եղա, թե որքան դժկամությամբ են կողմերը՝ հատկապես թուրքական կողմը, գնում երկխոսության: Սառույցը կոտրվեց ժողովրդական դիվանագիտություն նախաձեռնելու հայտարարումից հետո, երբ երկու երկրների քաղաքացիական հասարակության ներկայացուցիչները մի շարք ծրագրեր նախաձեռնեցին: Այսօր արդեն ես հատկապես ուրախ եմ այս սրահում տեսնել նոր սերնդի հայ և թուրք ներկայացուցիչների, ովքեր պիտի կյանքի կոչեն այս ծրագրերը: Կցանկանայի իմանալ, թե ձեզնից յուրաքանչյուրն ի՞նչ է անելու պատմության ընթացքը փոխելու համար, և հուսով եմ, որ «Բարձրաձայնելով անցյալը» գրքում շարադրված պատմությունը ձեր համար ուղեցույց և տեղեկության աղբյուր կդառնա»,- իր ելույթի ժամանակ նշեց գրքի հեղինակ Դեյվիդ Ֆիլիպսը:

2001-2004թթ. Թուրքիայում և Կովկասում ժողովրդական դիվանագիտության ոլորտում մի շարք ծրագրեր ղեկավարած Դեյվիդ Ֆիլիպսը հայ ընթերցողին ներկայացրեց իր «Բարձրաձայնելով անցյալը» գրքի հայերեն թարգմանությունը: Գրքի շնորհանդեսին, որը տեղի ունեցավ 2010թ. փետրվարի 4-ին Երևանում, Անի Պլազա հյուրանոցում, ներկա էին ժողովրդական դիվանագիտության նախաձեռնությունների մասնակիցներ, պետական և հասարակական գործիչներ, միջազգային կառույցների ներկայացուցիչներ:Գրքում նա պատմում է hայ-թուրքական ժողովրդական դիվանագիտության նախաձեռնության ընթացքում ձեռք բերած փորձի և քաղած դասերի մասին:

Գրքի հայերեն թարգմանությունը և հրատարակությունը իրականացվել է Մարդկային զարգացման միջազգային կենտրոնի և Եվրասիա համագործակցության հիմնադրամի աջակցությամբ, ԱՄՆ Միջազգային զարգացման գործակալության տրամադրած միջոցներով: