ՄԶՄԿ-ն շարունակում է Հայաստանում խթանել ՆԱՏՕ-ի առաքելության և գործունեության վերաբերյալ հասարակության ավելի խորը ընկալումը: Հայկական ատլանտյան ասոցիացիայի (ՀԱԱ) հետ համատեղ ՄԶՄԿ-ն ջանում է բարձրացնել հատկապես երիտասարդների իրազեկությունը տարածաշրջանում և ընդհանրապես աշխարհում ՆԱՏՕ-ի դերի վերաբերյալ:

Ավելի քան հիսուն երիտասարդներ և փորձագետներ Հայաստանից, Վրաստանից, Ռուսաստանից, Թուրքիայից և Ուկրաինայից 2010թ փետրվարի. 4-6-ը մասնակցեցին «Հարավային Կովկասի երիտասարդական ֆորում: ՆԱՏՕ-ի անվտանգության հայեցակարգը. ո՞րն է մեր դերը» տարածաշրջանային սեմինարին, որը կազմակերպել էին ՀԱԱ-ն և ՄԶՄԿ-ն՝ Նորվեգիայի ատլանտյան հանձնաժողովի օժանդակությամբ:

Սեմինարի առաջին օրը նվիրված էր ՆԱՏՕ-ի նոր ռազմավարական հայեցակարգին և Հարավկովկասյան երկրներ-ՆԱՏՕ հարաբերություններին: Մասնակիցները քննարկեցին նաև շրջակա միջավայրին և անվտանգությանը վերաբերող առանձին խնդիրներ: Զեկուցումներով հանդես եկան հայ և օտարերկրացի փորձագետներ: Մասնակիցները այցելեցին նաև Երևանում ՆԱՏՕ-ի տեղեկատվական գրասենյակ:

Երկրորդ օրը նվիրված էր շրջակա միջավայրի խնդիրներին: Երիտասարդները մասնակցեցին կլիմայի փոփոխությանը և միջավայրի աղտոտմանը վերաբերող Կոպենհագենի կոնֆերանսի հիման վրա դերային խաղին՝ որպես պետությունների կամ գերատեսչությունների ղեկավարներ: Արդյունքում, երիտասարդները ձեռք բերեցին ոչ միայն տեսական գիտելիքներ, այլև հնարավորություն ունեցան դրանք կիրառելու գործնականում: Սեմինարի ավարտին մասնակիցները ստորագրեցին «Ածխածնի արտանետման նվազեցման» և «Շրջակա միջավայրի գլոբալ հիմնադրամի» արձանագրությունները: