2010թ. սեպտեմբերի 7-ին «Նորսկ Էներջի» ընկերությունն իր հայկական գործընկեր «Հիդրոէներգետիկա» ընկերության և ՄԶՄԿ հետ համագործակցությամբ սկսեց Հայաստանում փոքր ՀԷԿ-երի հատվածի բազմաթիվ մասնակիցների գործունեության խթանմանը և ՀԷԿ-երի տեխնիկական կարողությունների զարգացմանն ուղղված քառամսյա ծրագիր:

Վերապատրաստման ծրագիրը նախատեսում է 4-6 նորակառույց կամ արդեն գործող փոքր ՀԷԿ-երի սեփականատերերի կամավոր մասնակցությունը: Վերապատրաստվողները, ովքեր ընտրվել են բաց մրցույթի արդյունքում, ունեն բարձրագույն կրթություն հիդրոտեխնիկական կառուցվածքների, հիդրոէներգետիկայի ոլորտի նախագծման, շինարարության, բնապահպանական տնտեսագիտության և գործարարության բնագավառներում: Ծրագրի իրականացման ողջ ընթացքում վերապատրաստվողները կուսումնասիրեն ամբողջ հզորությամբ արդյունավետորեն աշխատող էլեկտրակայանների համար նախատեսվող տարբեր գործարարական, ռազմավարական և տեխնիկական իրավիճակներ: Այդ նպատակով մի քանի շաբաթվա ընթացքում մասնակիցներն ինտենսիվ կհաճախեն թե՛ դասախոսությունների, զեկուցումների և սեմինարների, և թե՛ կկատարեն անհատական աշխատանքներ: ՄԶՄԿ-ն դասընթացների մասնակիցներին կհաղորդի բանակցությունների և արդյունավետ հաղորդակցության խորը գիտելիքներ և հմտություններ:

Ծրագրին աջակցում են Ամերիաբանկը, ՀՀ էներգետիկայի նախարարությունը, ՀՀ բնապահպանության նախարարությունը, KfW-ի կողմից ֆինանսավորվող ԳՀՀ «Վերականգնվող էներգիայի աջակցություն» ծրագիրը (GAF-RE-KfW), Երևանի ճարտարապետական և շինարարության պետական համալսարանը և ֆինանսավորվում է Նորվեգիայի արտաքին գործերի նախարարության կողմից: