2013 թ. սեպտեմբերի 13-ին Մարդկային զարգացման միջազգային կենտրոնի նախաձեռնությամբ հրավիրվեց Խորհրդատվական հանձնաժողովի նիստ, որի ընթացքում կառավարության, մասնավոր հատվածի և քաղաքացիական հասարակության ներկայացուցիչներին պաշտոնապես ներկայացվեց Զբաղվածության գործակալություններին տեղեկատվական աջակցության համակարգը՝ ՈՒԼԻՍՍԵՍ հարթակը: Հարթակը մշակվել է ՄԶՄԿ-ի կողմից «Հայաստանում աշխատանքային միգրացիայի գիտավերլուծական կառավարման հզորացում» եռամյա ծրագրի շրջանակներում:

Հարթակը հնարավորություն է տալիս արդյունավետորեն միացնել ԵՄ անդամ պետությունների աշխատուժի պահանջարկը Հայաստանի աշխատուժի առաջարկին՝ հեշտացնելով երկու աշխատաշուկաների միջև տեղեկատվության փոխանակումը, զգալիորեն նվազեցնելով գործարքային ծախսերը, ինչպես նաև մասնավոր հատվածի, հասարակական կառույցների և ընդհանրապես հասարակության շրջանում ձևավորելով վստահություն Շրջանառու աշխատանքային միգրացիա գործընթացի նկատմամբ: Հարթակի ծառայությունները աշխատանք փնտրողներին և ընկերություններին տրամադրվում է անվճար (հարթակը շահագործելու համար ոչ մի լրացուցիչ գումար չի գանձվում):

Միայն միջնորդ ընկերությունները կարող են գրանցվել և օգտվել հարթակի առաջարկած ծառայություններից: ԵՄ-ում աշխատել ցանկացող աշխատանք փնտրողները պետք է դիմեն մասնավոր կամ հասարակական միջնորդ ընկերության: Այս մոտեցումը երաշխավորում է հարթակում պարունակվող տեղեկատվության հուսալիությունը: ՈՒԼԻՍՍԵՍ հարթակը հնարավորություն է տալիս ստեղծել աշխատանք փնտրողի համապարփակ պրոֆիլ, որը ներառում է անձնական և կոնտակտային տվյալներ, տեղեկատվություն կրթության և աշխատանքային փորձի մասին: Հարթակը նաև տրամադրում է առցանց գործիքներ աշխատանք փնտրողի լեզվական գիտելիքները և ընդհանուր հմտություններն ու կարողությունները գնահատելու համար: