2001թ.- գործող

2001թ. ի վեր ՄԶՄԿ-ն իր ուշադրությունը  կենտրոնացրել է ծխախոտի դեմ պայքարի խնդիրներին: Հայաստանում ծխելու ցուցանիշը մշտապես  բարձր է եղել. չափահասների շուրջ մեկ երրորդը կանոնավոր ծխողներ են: Ծխելու հետևանքով առաջացած հիվանդությունների  պատճառով Հայաստանում 35-69 տարիքային խմբի ծխողների շրջանում տարեկան գրանցվում է  շուրջ 3000 մահվան դեպք: Ծխելը բավականին տարածված է պատանիների շրջանում: 2004թ. անդամակցելով Առողջապահության համաշխարհային կազմակերպության  Ծխախոտի դեմ պայքարի շրջանակային կոնվենցիային՝ Հայաստանում ձևավորվեցին առավել նպաստավոր  պայմաններ ավելի խիստ քաղաքականություն և օրենսդրական դաշտ մշակելու համար: Սակայն  «ծխախոտային լոբբին» չափազանց ամուր  հիմքեր ունի Հայաստանում: ՄԶՄԿ-ն այս բնագավառում առաջատար դիրք է գրավում և  հանդիսանում է 12 նախաձեռնությունների հեղինակ ու իրականացնող: Ծխախոտի դեմ  պայքարի առավել խիստ քաղաքականության  ազդեցությունը  տնտեսության վրա Կենտրոնի հատուկ ուշադրության կենտրոնում է: ՄԶՄԿ-ն նշանակալի  դերակատարում է ունեցել Առողջապահության համաշխարհային կազմակերպության Ծխախոտի  դեմ պայքարի շրջանակային կոնվենցիային (ԾՊՇԿ) Հայաստանի անդամակցելու և ծխախոտի ու  դրա արտադրատեսակների վրա հարկերի վերջին ավելացումների հարցում: ՄԶՄԿ մեկական անդամներ  մասնակցել են ԾՊՇԿ «Ծխախոտի ապօրինի առևտրի» և «Ծխախոտի մշակման» արձանագրությունների  մշակման աշխատանքներին՝ ներկայացնելով Եվրոպական տարածաշրջանը: Կենտրոնը հանդես է  եկել բազմաթիվ հրապարակումներով և իրականացրել է նախադեպը չունեցող հետազոտություն՝  Հայաստանում ծխելու տարածվածությունն ուսումնասիրելու նպատակով: ՄԶՄԿ-ն  Շրջանակային կոնվենցիայի դաշինքի և Հայաստանն առանց ծխախոտի դաշինքի անդամ է, վարում  է յուրօրինակ համացանցային կայք` nosmoking.ichd.org հասցեով:

2002-2004
Տարածաշրջանում հանուն խաղաղության և կայունության համագործակցությունը խթանելու ուղղությամբ իրականացված առաջին նախաձեռնություններից մեկը գյուղատնտեսության ոլորտում տարածաշրջանային համագործակցության համար համապատասխան հարթակ ձևավորելու ՄԶՄԿ ծրագիրն էր: Մտահղացումը նպատակ էր հետապնդում ծառայեցնել տարածաշրջանի երկրների գործարար համայնքների շահերն ու երկրների շուկաները խաղաղության կերտման և անվտանգության ապահովման գործին: