2022-2027

Մարդկային զարգացման միջազգային կենտրոնը 2022թ. հունիսից միացել է «Քաղաքացիական կրթություն և մասնակցություն» ծրագրին,  որն իրականացնում է «Փրոջեքթ Հարմոնի Հայաստան» հասարակական կազմակերպության գլխավորած կոնսորցիումը, որի անդամներն են նաև ՄԶՄԿ-ն, Սիվիտաս Հայաստանը և Կրթական տեխնոլոգիաների ազգային կենտրոնը։ Ծրագիրը հնարավոր է դարձել ամերիկյան ժողովրդի աջակցությամբ՝ ԱՄՆ ՄԶԳ միջոցով:

«Քաղաքացիական կրթություն և մասնակցություն» ծրագիրը կբարելավի Հայաստանում դպրոցական և արտադպրոցական քաղաքացիական կրթության որակն ու կընդլայնի դրա ազդեցության շրջանակը, որպես հանրային կյանքում երիտասարդների ներգրավվածության խթանման միջոց՝ աջակցելու Հայաստանում ժողովրդավարական հասարակության ուժեղացմանը։

«Քաղաքացիական կրթություն և մասնակցություն» ծրագրի նպատակն է․

1) ֆորմալ կրթության միջոցով աշակերտների քաղաքացիական մասնակցության կարողությունների բարելավումը․ 

2) երիտասարդների քաղաքացիական ներգրավվածությանը նպաստող միջավայրի բարելավումը: 

Ֆորմալ քաղաքացիական կրթության բարեփոխումների և երիտասարդների ոչ ֆորմալ ներգրավման միջոցով ծրագիրը կընդլայնի որոշումների կայացման մեջ երիտասարդների ներգրավվածությունը, ինչպես նաև նրանց հնարավորությունները՝  ներգրավվելու կառավարման գործընթացներում: Այս ամենը  կնպաստի երիտասարդների քաղաքացիական մասնակցությանը միտված համակարգային փոփոխությունների իրականացմանը: 

Ծրագիրը մինչև 2026 թվականը կապահովի Հայաստանում երիտասարդների կրթության և քաղաքացիական ներգրավվածության ամուր, ներառական և նորարարական էկոհամակարգ՝ կարողությունների զարգացման, ուսուցման, վերապատրաստման,  ներդրումների և համագործակցության ցանցերի ստեղծման նորարարական մոդելի միջոցով:

Ծրագիրը կաշխատի Հայաստանի դպրոցների, համալսարանների, համայնքների, կառավարության, մարզային և տեղական իշխանությունների հետ՝ բարելավելու դպրոցական և արտադպրոցական քաղաքացիական կրթության որակն ու շրջանակը՝ որպես երիտասարդների գիտելիքների, վերաբերմունքի և վարքագծի վրա դրականորեն ազդելու միջոց։ 

Ծրագրի հինգ տարիների ընթացքում ՄԶՄԿ-ն նախատեսում է իրականացնել որոշումների կայացման մեջ երիտասարդների ներգրավվածության համապարփակ գնահատում, մշակել որոշումների կայացման մեջ երիտասարդների ներգրավվածության մոնիտորինգի մեթոդաբանություն և գործիքներ,  ոլորտային քաղաքականության մշակմամբ հետաքրքրված երիտասարդների համար կազմակերպել ամառային դպրոցներ, ամենամյա երիտասարդական ցուցահանդեսներ կազմակերպել 2023-2025թթ․, մարզերում ու Երևանում անցակցնել համայնքային քննարկումներ՝ երիտասարդության դերն ու ներգրավվածությունն իրենց համայնքներում քննարկելու համար, ինչպես նաև ՔՀԿ-ների համար կազմակերպել «Երիտասարդների դրական զարգացման հայեցակարգի» վրա հիմնված դասընթացներ: