Հայաստանում գենդերային բռնությունների կանխարգելումը քաղաքացիական հասարակության ներկայացուցիչների և քաղաքականություն կերտողների հետևողական աշխատանքի կարիքն ունի: Այս ուղղությամբ իրականացված գործողությունները նպատակ ունեն նվազեցնել երկրում գենդերային բռնությունները և բարձրացնել հանրային իրազեկությունը գենդերային բռնության և դրա վերացման ուղիների վերաբերյալ:

Գենդերային բռնության կանխարգելմանն ուղղված միջոցառումների իրականացման արդյունավետության բարձրացման, տեղեկատվության հավաքագրման և փոխանակման մեխանիզմների մշակման, ինչպես նաև «Ընդդեմ գենդերային բռնության» ազգային ծրագրի մշակման նպատակով վարչապետի 2010թ. մարտի 30-ի որոշմամբ ստեղծվել է Գենդերային բռնության դեմ պայքարի միջգերատեսչական հանձնաժողով, որի անհատական կազմում ներառվել է նաև ՄԶՄԿ ներկայացուցիչը:

ՄԶՄԿ-ն այս բնագավառում բավականին հարուստ փորձ ունի: 2008թ. սեպտեմբերից ի վեր Կենտրոնը կազմավորել և առաջնորդում է քաղաքացիական հասարակության կազմակերպությունների կոնսորցիումը, որը նպատակ է հետապնդում ձևավորել Հայաստանում գենդերային բռնության նվազմանը և այս ոլորտում երկրի ստանձնած պարտավորությունների իրականացմանը նպաստող միջավայր: