Առանց տղամարդկանց ակտիվ գործողությունների և իրենց պատասխանատվության գիտակցության գենդերային բռնությունը չի վերանա հասարակություններից: Հարավային Կովկասում վիթխարի աշխատանք կա իրականացնելու մեր ընտանիքներում, աշխատավայրերում և առհասարակ հասարակության մեջ առկա գենդերային բռնության վերացման ուղղությամբ: Թվում է, սրան հասնելու համար պատերազմներից ծվատված Հարավային Կովկասի պատրիարխալ հասարակությունները երկար ճանապարհ ունեն անցնելու: Այդուհանդերձ, նույնիսկ ամենաերկար ճամփորդությունը սկսվում է առաջին քայլից:

Հայաստանից, Ադրբեջանից և Վրաստանից երեսուն տղամարդ հավաքվել եին այդ առաջին քայլը կատարելու նպատակով: 2010թ. ապրիլի 14-18-ը Միավորված ազգերի Բնակչության հիմնադրամը Թբիլիսիում կազմակերպել էր գենդերային բռնության դեմ պայքարում տղամարդկանց դերի և պատասխանատվության վերաբերյալ «Տղամարդիկ խոսում են տղամարդկանց հետ» խորագրով սեմինար, որին մասնակցեցին տարբեր ազգության, տարիքի և մասնագիտության տղամարդիկ: Նրանց բոլորին համախմբել էր մի ընդհանուր գաղափար. պայքարը բռնության դեմ՝ խնդիրը բարձրաձայնելու և բռնության դեմ գործողությունները համատեղ իրականացնելու միջոցով: Սեմինարը վարեց գենդերային բռնության դեմ պայքարի համաշխարհային առաջամարտիկներից մեկը՝ հրապարակախոս, դասախոս, խորհրդատու, «Սպիտակ ժապավեն» շարժման համահիմնադիր՝ դոկտոր Մայքլ Կաուֆմանը:

ՄԶՄԿ-ն աջակցեց սեմինարի կայացմանը՝ ապահովելով Միավորված ազգերի Բնակչության հիմնադրամի կողմից ֆինանսավորվող «Պայքար Հայաստանում գենդերային բռնության դեմ» ծրագրի շահառուների մասնակցությունը: Տասը տղամարդ, որոնք վերապատրաստվել էին ՄԶՄԿ-ի գլխավորած հայաստանյան հասարակական կազմակերպությունների կոնսորցիումի իրականացրած դասընթացներում, մասնակցեցին սեմինարին և ձեռք բերեցին գենդերային բռնության դեմ պայքարի վերաբերյալ նոր գիտելիքներ և հմտություններ: Մասնակիցները, ովքեր աշխատում են հանրային կառույցներում, վերլուծական կենտրոններում, ՀԿ-ներում, գլխավոր դատախազի գրասենյակում և այլ հաստատություններում, կշարունակեն գործել իրենց երկրներում և առաջնորդել տղամարդկանց՝ այս ուղղությամբ իրականացվող քայլերը: