Նոյեմբերի 10-11 Երևանում կայացավ «Արևելյան գործընկերություն. զարգացումների ներքաղաքական և Եվրոպական համատեքստը» համաժողովը: Այն կազմակերպել էր Մարդկային զարգացման միջազգային կենտրոնը՝ Հայաստանում Եվրոպական միության պատվիրակության, Մոզայիկ ինստիտուտի և «Ֆրիդրիխ Էբերտ» հիմնադրամի օժանդակությամբ: Համաժողովի նպատակը Հայաստանում քաղաքականության մշակման և որոշումների կայացման գործընթացում քաղաքացիական հասարակության և հասարակական կազմակերպությունների դերի բարձրացմանը նպաստելն է: Սա եվրոպական ինտեգրմանը նվիրված յոթերորդ ամենամյա համաժողովն էր, որը Եվրոպական միության հետ Հայաստանի Հանրապետության ինտեգրման գործընթացի ընթացքը փորձագիտական համայնքին և լայն հասարակությանը ներկայացնելու ու լուսաբանելու ուրույն ամբիոն է դարձել: Համաժողովին մասնակցեցին Հա­յաս­տանի, Վրաստանի, Չեխիայի, Թուրքիայի, Ֆինլանդիայի, ինչպես նաև եվրոպական և միջազգային կառույցների, այդ թվում` ԵՄ, ԵԽ, ԵԱՀԿ ներկայացուցիչներ: Համաժողովի բացմանը ողջույնի խոսքով հանդես եկան ՀՀ Արտաքին գործերի նախարար պրն. Էդուարդ Նալբանդյանը, Ֆինանսների նախարար Տիգրան Դավթյանը, Արդարադատության նախարար Հրայր Թովմասյանը և Հայաստանում ԵՄ պատվիրակության ղեկավարի պաշտոնակատար Օննո Սիմոնսը: Համաժողովում զեկույցով հանդես եկավ ԵՄ խորհրդատվական խմբի ղեկավար Անտի Հարտիկայնեն, ԵԱՀԿ-ի Ժողովրդավարական ինստիտուտների և մարդու իրավունքների գրասենյակի առաջին փոխտնօրեն Դուգլաս Ուեյքը և այլոք: Համաժողովը եզրափակիչ ուղերձով ամփոփեց ՀՀ վարչապետ Տիգրան Սարգսյանը և Եվրանեստի համանախագահ Կրիստիան Վիգենին: