«Մարդկային զարգացման միջազգային կենտրոն» (ՄԶՄԿ) հասարակական կազմակերպությունը Հայաստանում Եվրոպական հանձնաժողովի պատվիրակության և  «Ֆրիդրիխ Էբերտ» հիմնադրամի օժանդակությամբ կազմակերպել էր «Եվրոպական ինտեգրում 2012. Համընդհանուր եվրոպական արժեքներ՝ կյանքն առանց խտրականության»  խորագրով համաժողով: Համաժողովը տեղի ունեցավ ս.թ. նոյեմբերի 27-28, Երևանում, «Անի պլազա» հյուրանոցում: 

 Համաժողովի նպատակն էր նպաստել Արևելյան գործընկերության երկրներում եվրոպական արժեքների արմատավորման գործընթացին և խթանել քաղաքացիական հասարակության, մասնավորապես՝ հասարակական կազմակերպությունների համապատասխան նախաձեռնություններին: Սա եվրոպական ինտեգրմանը նվիրված ութերորդ ամենամյա համաժողովն էր, որն ուրույն ամբիոն է դարձել Եվրոպական Միության հետ Հայաստանի Հանրապետության և Արևելյան գործընկերության մյուս երկրների ինտեգրման գործընթացի ընթացքը փորձագիտական հանրությանը և լայն հասարակությանը ներկայացնելու և առկա խնդիրները լուսաբանելու համար:

 Համաժողովին մասնակցեցին Հայաստանի, Ուկրաինայի, Սլովենիայի, Թուրքիայի, Գերմանիայի,  ինչպես նաև եվրոպական և միջազգային կառույցների, այդ թվում` ԵՄ, ԵԱՀԿ և ՄԱԲՀ  ներկայացուցիչները: